(Geschichte für das Mitteilungsblatt Gemeinde Kernenried Mai/Juni 2023)
«Wieder nid glichzytig fertig», töberet dr Lehrer vor sine 18 Schüeuer wo ir füfte bis ir nünte Klass si. Hie im chline ämmitaler Buuredörfli wärde d’Schüeuer usder erschte bis zur vierte Klass u äbe vor füfte bis i die nünti Klass je zäme ungerrichtet. Das isch öbbedie veiechlei es Dürenang u drunger u drüber. De muess de z’Frölein Moser vor Ungerstuefe und dr soäbe i Rage gratnig Herr Fankhuser vode grösere Buurscht auethaube eis ufe Tisch chloppfe. Dr sportlech Leischt het ganz roti Ohre u fuchtlet wie wiud mit sine Häng im Züg ume. Dr eint oder anger Schüeuer muess sich bi däm Schouspieu vei z’Lache verhäbe, wobis de angere eher chli gschmuech wird. «I wott mi de mit öich morn nid blamiere. Nätnech jetz mau zäme u loset ufenang, de wärdet dir mit dem Kanon ou mitenang fertig. Am Chönne würds binech nid liege. Dir heit eifach dr Gring nid bir Sach.», pouteret dr Fankhuser ganz entnärvt.
Die Klass isch ir letschte Prob fürne Uftritt am morgige Samschtig vorem Mittag. Ufem Hof vo Bärtschis fingt wie au Jahr zum Ändi vo de Hustage dr Viehmärit statt. Dr ganz Tag isch dert es feschtlechs Triebe u mitem langsam feischter wärde, chunnts de zur Stubete.
Düre Tag si dert unbestritte d’Chüe die am schönschte härgrichtete ufem Platz. Gäge Dämmerig wärde de die Vierbeiner vo de ufbrätzlete Froue konkuränziert. Ou z’Mannevouk isch denn mehrheitlech suber rasiert u useputzt.
Die erschte Chüe wärde am Samschti frühe mite erschte Sunnestrahle ader länge Chötti, wo zwüsche zwöi mit Houz beladne Fuherwärk gspannet isch, mit Häuslig abunge. Am Rand vom grosse Hofplatz wärde die erschte Gatter u Chefige mit Hühner, Änte, Geissli, Chüngle u auerlei angerne Viecher gfüut. Das Gfieder u die Fählige wärde de düre Tag aus Näbeschouplatz ghandlet. Meischtens si das Gofe wosech so es Sackgäud ergattere.
D’Feschtwirtschaft isch gäge Mittag so richtig vou u die einte Viehzüchter chöme gar nüm usem plagiere wobi die schlächter abgschnittene über die ungrächti Bewärtig wättere. Das fühert ou öbbe mau zumene lute u böse Wort, wo de när mitemene guete Brönnte wieder guet gmacht wird.
Dr Fankhuser hetsech ufem chline houzige Tanzbühneli grad i Stellig bracht u d’Ching heisech imene Boge um ihn ume formiert. Är git dr erscht Ton wo aui schön abnäh und uf sis zackige Handzeiche fösi wie güebt afa singe. Miteme z’friednige Lächle vom Leischt starte si nachem erschte gmeinsame Durchgang i erscht Kanon. Juscht i däm Momänt wo die zwöiti Gruppe isetzt gumpet e junge Sennehung is Gheg vode Gäns. Nachemene lute Gmisch vo Bäue u Schnattere umene unkontrollierte Hin und Här i däm Gheg, flattere die Gäns über d’Absperrig. Die einte zwüsche de Scheiche vo de Chüe düre u e angeri gumpet vo Chuerügge zu Chuerügge, damit sie däm kläffende Ungetüm chöi entcho.
Das wird ou dene süsch friedlech wiederchöiende Miuchviecher z’vieu. Die riesse sich los u seckle mit eim Garacho i jedi Richtig los. Eini rumt grad dr Grill um. Die angeri rammt die vou bsetzte Feschtbänk. Eini wauzt d’Hühnergheg um u spurtet richtig Weid. Mittlerwile isch eis riese Dürenang vo auerlei Tier u hecktische Lüt wo däm Desaschter probiere es Ändi z’setze. Daderbi isch nid klar, öbsi öbbis erreiche oder nume aues no schlimmer mache.
Ou dr Fankhuser u sini Schüeuer stöh nüm uf ihrne Pöschte u hei sich is Chaos gstürzt. Natürlech ohni dä lang güebt Kanon z’vouände. Es het schier dr ganz Nami brucht, bis das Unglück wieder isch behobe gsi. Viehschou hetmer abbroche, wüu sich die gschnigglete Chüe u aues drumum verschiesse oder süsch dräckig gmacht hei. Ou die ehemaus usebutzti Feschtgseuschaft het dr aschyn gmacht, sie sigi aui zäme dürne Schlammgruebe gschnagget.
Wo gäge Fyrabe aues wieder einigermasse härgrichtet isch gsi u aui Viecher bim Frässe i ihrem daheime dä ufregend Tag verdouet hei, ischmer du ändli zum gmüetleche Teu übergange. Nachere churze Asprach vom Viehzuchtpräsident het du no einisch die Schueuklass mitem Fankhuser chönne e Versuech ungernäh. Mitem haute vom Ton si du die sogar z’erschte mau aui glichzytig fertig worde. E richtigi Gneugtueig füre Leischt. Dr ganz Abe heter när vo dere begabte u musikalische Klass gschwärmt. Natürlich hets für das die herti Hang u d’Hartnäckigkeit vom Fankhuser brucht. Süsch wär das nie öbbis worde, heter vorlut referiert.
Mit Tanz, gmüetlechem Zämesy, lüpfiger Schwyzerörgelimusig, gnue z’Ässe u z’Trinke, isch die Viehschou bis spät i d’Nacht de am Ändi zue gange.
Kommentar schreiben