(Geschichte im Rahmen der wöchentlichen Corona Information der Gemeinde Kernenried, 2020)
Aues sigi guet im Stau bi de Chüe, jedi heigi bis drahäre gfrässe was si müess u miter Mäucherei sigi nume no 3 vo dene 42 Miuchchüe im Hingerlig, het Tinu gseit woner zum Mittagässe a Tisch ghocket isch. Z’Rösi, sini Frou het gmeint, das sigi scho flott gäge früecher, wo die Mäucherei derewä e Chrampf u zytufwändig isch gsi. Jetz heigmer wenigschtens ou mau Zyt öbbis für sich z’mache u dr Fyrabe sigi ou eis vorem fyschter wärde. Die Buurelüt im Oberdorf heis sichtlich gnosse e chli meh fürenang chönne da z’si. Dr Grossätti, ou am grosse Houztisch hockend, d’Euböge ufgstützt u dr Chopf schier i de Häng trägend, het vorsech härebrümelet: «Es paar Chnöpf drücke u ine Fehrnseeröhre gaffe, däm seitmer hüt Buure. E Schang nüt aus e Schang». Wie meischtens we Ätti öbbis gmöffelet het, ischer nid beachtet worde. Nume z’Beetli sini Frou, wo hinger ihm füre d’Suppe imene dunkubrune Tongschiir ufe Tisch gsteut het, ischim miter Hang übere Chopf gfahre u het ruhig zuenim gmeint: «Ätti, es isch hüt angers aus früecher. Di Junge müesse i Zuekunft luege». Är het wieder öbbis vorsech häre brümelet, wo aber dismau niemer verstange u so ou gar niemer beachtet het. D’Laura het du am Grosi vo de schöne Blueme verzeut, wo sie hüt morge zu bunte u fantasievoue Strüss het dörfe zämesteue. Sie isch aus Florischtin im zwöite Lehrjahr u verzeut immer vou Begeischterig vo ihrem naturnahe Bruef. Dr Löru, wo grad ir achte Klass isch usech mit däm us sire Sicht unlogische Franz u Änglisch muess usenang setze, isch nid haub so begeischteret vo sim momentane Würkigsfäud. Är futeret derewä über das frömde Gred, dassne d’Muetter zur Mässigung muess ahaute. Är wärdi de einisch scho no gseh, wie wichtig grad z’Änglische sigi. Dr Vater het du grad nachedopplet u gmeint: «Wenn ig nid chli Frömdsprachkenntniss hätti, chämti ig mit dere nöie Mäucherei nie z’gang. Die Mänuäl si ja aui nid uf Dütsch sonder i dere internationale Sprach gschribe». Da het z’Rösi lut afa lache u seit vor aune zu Tinu: «Genau du Sprachschenie. Wie eismau wo dr Delaval aglüte hesch, du müessisch e Reinigungstube ha für d’Mäucherei wieder i gang z’bringe. Nach langem hin und här hetsech du aber usegsteut, dass ir Aleitig gstange isch clean tube before connect, was so vieu heisst wie putz z’Rohr bevors wieder aschliessisch. Nüt vore Reinigungstube!». Grosses Glächter het die Tischrundi erfüut. Bis ufe Buur, dä hets grad nid so witzig gfunge. Sogar dr Grossätti, wo vo au däm nüt verstange het, het sich bi dere Uslacherei la astecke. «Isch scho guet Muetter», het dr Tinu gseit, «das isch haut nid so eifach wie es Rezäpt im Chochbuech, wo aues uf Dütsch steit, z’läse».
Nach däm usgibige u ungerhautsame Mittagässe hei sich aui irgendwohäre verzoge u hei’s no chli la verdoue. Oder si heis ömu aui im Sinn gha. Bim Buur ufem Handy isch nämlech es Glüt losgange u d’Sprachnachrichte hei ihm dr chli Biudschirm gfüut u azeigt, dass öbbis miter Mäuchmaschine nid irornig isch. Am Rösi heter erklärt är müess grad sofort ga luege, wüu ir Nachricht öbbis vo «Fatal error» miteme kommische Code gstange sigi u das heissi gar nüt guets. Dr Tinu isch scho es Momäntli um die Maschinerie umegschnaaget u gstange, het am einte oder angere Ort eis dra ghoue u ou aui Schlüch kontrolliert. Nüt isch da derbi passiert oder usecho. Gnärvt u schuurig gstresst vo dere nid funktionierende Gräterei, de ungedudige Chüe wo brüelend vore dranne gstange si u hätte wöue ga abmäuche, isch är is Mäuchbüro zum Stürigscomputer gsprunge. Vorem Biudschirm stehend, hets dert nume farbig blinket u glüchtet u ab und zeue si ungerschiedlechi Mäudige azeigt worde, wo är äbe uf änglisch nid verstange het. Es Momäntli het dä sichtlech überforderet Buur probiert mitem Übersetzigsprogramm vo sim Handy die Azeige z’interpretiere. Grad so guet hät är chönne siner Chüe um Rat frage, da wär öbbe glich vieu derbi use cho. Wo du no es luts u penetrants Horni losgange isch, um äuä uf die Störig ufmerksam z’mache, ischim dr Gedudsfade grisse u är isch fluechend, so dasses em Pfarrer derbi schlächt worde wär, usem Stau is Huus übere gschuenet.
Im chline Büro, wo ire Nische im Gang vom Buurehuus, igrichtet isch, het är sich hingerne nigunagu nöie u bunt glänzige Ordner gmacht. D’Büüri hetne no gfragt was är machi, het aber ussert wieder es paarne Schimpfwörter nüt us ihm usebracht. Dr Buur het im Ordner e Notfaunummere usegsuecht. Die het är mehreri Mau ufem Handy nöi müesse i gä, wüu die nätti u wyblechi Outomatestimm ufder angere Site gäng e Nummere het wöue, womer muess vo Hang i gä. Aber bis dr Buur de aube am vermeintlech richtige Ort ufem Smartphone drückt het, isch die Stimm wäg gsi u z’Telefon het wieder abghänkt gha. Derzeu het är vom Schwitze es seichnasses Hemli übercho, es hetim vor Stirne über d’Ouge abe ufe Ordner tropfet u die füechte Schweisshäng het’s ufem Display vom Handy fasch nüm agno. Das het nid ghufe, um die Sach z’beruhige. Nach Langem isch är bim technische Support, auso die Lüt wo eim bi Problem söte chönne häufe, glandet. E glassne junge Typ het vo ihm afe mau e Reihe administrativi Informatione wöue: vo Serienummere, Adrässe, Bsitzer, letschts Wartigsdatum, Alagetyp und und und… Bis es a däm Landwirt dr Nuggi usetätscht het u är däm Bürschtu am angere Leitigsändi au Gottschang wüescht gseit het. Wyterhin ruhig het dä Typ gmeint dr Buur müessi zur Alag häre ga, so dass sie gmeinsam es paar Sache chönni düretschegge. I immer no zuenämender Töibi isch dr Tinu mitem Handy am Ohr, wieder i Stau übere glüfe u het da derbi schier dr Grosätti übere Hufe gsecklet, wo ihm vom Stau här gäge z’Buurehuus entgägecho isch. Dr Grossätti het no öbbis zuenim wöue säge. Dr Buur het aber nid zueglost, het Ätti eifach la stah u isch rübis u stübis im Stau verschwunde. Wo är dert nach Aleitig vo sim Supporter vorem Biudschirm isch gstange, het dä Monitor usgseh wie nie öbbis wär passiert. Ou die vorhär so aggressiv hülendi Sirene isch plötzlich nüme z’ghöre gsi. Dür Tschybe im Miuchbüro het är zur Mäuchalag gseh, wo grad eini vo de vorhär no ungedudig wartende Chüe, sich i eim Seelefride het la abmäuche. Dr Tinu het d’Wäut nüm begriffe u wo dr Typ am Telefon no seit är heig sich äuä tosche, är chöni online kei Fähler feschtsteue u nachem System sigi ja grad e Chue am Mäuche, isch Tinu mitere Bluetlääri im Gring fasch ohnmächtig worde. Dr Buur het sich la ufe Stuheu abegheie u het unglöibig ufe Biudschirm gluegt, wo dä vor Delaval online mit ihm zäme es paar Teschtwärte het überprüeft. Schlussändlech het sich nüt angers usegsteut, aus dass z’System nöi gstartet worde sigi u süsch aues ir Ornig isch. Gschlage het dr Buur sich bedankt u z’Telefon wieder abghänkt.
Mittlerwyle isches scho tou im Namitag inne gsi u dr Buur het dringend es Kafifertig müesse ga ha, nachdäm är im Stau no mau aues uf si Richtigkeit überprüeft het gha. Am grosse Chuchitisch isch bereits dr Grosätti, z’Grosi u dr Junior ghocket. Dr Löru isch no grad ide letschte Züg vo sine Ufzgi gsi u het näbebi chli mietem Ätti gstichlet. Z’Rösi isch im Nachbardorf am Ichoufe gsi u d’Laura het no müesse schaffe. Dr Tinu isch mitem Kafi, wo meh aus üeblech Schnapps het drinne gha, ou zu dere lockere Gseuschaft a Tisch ghocket. Är het grad vo sim abverreckte Namitag wöue verzeue, wo Grosatt afat brichte: «Was isch äch das fürne gspässige Lärm gsi hüt nachem Mittag. I bi ufem Stubesofa am Pfuse gsi, wo plötzlich e luti Sirene gange isch. I bi när i Stau ga luege, wüui dänkt ha es sigi öbbis passiert. Im Stau isch niemer gsi u im Büro dert, isch dä Fernseh glüfe ohni dass öbber gluegt het. Dir gloubet nid, wie lang ig gha ha, bis i dä ha chönne absteue. Dä het nid ame inzige Ort e Chnopf zum Drücke gha. So hani däm haut dr Stecker uszoge une när wieder igsteckt. U woni wieder usem Stau bi, het ändlech ou die Sirene wieder Ruhe gä. E verruckti Sach isch das hützutags afe, da chunnt kei Mönscheseeu me nache». Am Buur isches wie Schuppe vo de Ouge gheit, wo ihm bewusst worde isch, dass är nume z’ganze System nöi hät müesse starte u so die Ufregig hät chönne vermide wärde. Verzeut het Tinu das vorlöifig no grad niemerem, derfür heter no mau es zwöits mindescht so chräftigs Kafifertig agrühert.
Kommentar schreiben