(Geschichte im Rahmen der wöchentlichen Corona Information der Gemeinde Kernenried, 2020)
Verusse im Garte isches scho sit einige Tage richtig strub u es rägnet andurend es Bizeli. Zwüschine isch sogar es Flöckli Schnee i däm Gsou u d’Byse chutet gfrörlig dür aues düre. D’Lüt, aui Tierli u aues wo kröicht u flöicht het sich i ihri Löcher verschloffe. Ane Outoungerstang, mitemene Ziegudach wo ordeli es Vordach het, gränzt es chlises Gärtli vomene Eifamiliehüsli. Das isch auso nid öbbe es Hüsli wo e Eierfamilie drinne wohnt, sondern eis wo eifach für eiinzegi Familie vorgseh isch. Äbe grad ungerem Dechli, wo’s e chli hiuber isch, si im Summer u Herbscht aube wunderschöni Tomate u Salatgurke. Dert im trochne Härd u de mittugrosse Ämmesteine wo am Rand na ufghüft si, hiesech die ungerschiedlechschte Chäfer, Würm u Insekte i Sicherheit bracht. Dert hetne das grusige Wätter nüt chönne a ha. Nume d’Rägewürm hei sich öbbe mau i nass Härd i de Beetli churz usegwagt. Aber sogar dene isch das Strubusse zvieu gsi u sie heisech de ou ungers Dechli u wieder töif i trochnig Bode verzoge. So het dert a däm Ungerstang zueche, veiechli es Gwimmu vo au dene Chrabbler gherscht. Das het natürlich langsam e chli zu Hektik u Stress gfühert.
Da hei d’Rägewürm us luter Längwili im Chor afa singe. Die chürzere Würm hei erschte oder zwöite Tenor gsunge, so dass aube fasch d’Schiebe vom Huus hei afa klirre. Die längere Würm hei die zwe Bäss zum Beschte gä, so dass de schier dr Bode het möge fibriere. Nachdäm das es paar Tag e so gange isch u sich die Chäfer u Co mit däm Gsang hei la beruhige, isch ar fette Chrützspinnele e gueti Idee cho. Sie het z’oberscht bide Ziegle, zwüschede Bäuke wo z’Dach träge, es kunschtvous u glizzerigs Netz gspunne gha u läbt scho ewig lang dert. Das achtbeinige Wybli isch so öbbis wine Chef oder Ratgäber für auerlei Sörgeli vo de Insekte i däm Tomategärtli. Zrügg zur Idee. D’Spinnele het vorgschlage, dass d’Rägewürm mit es paar angerne Insekte zäme doch söue es Musical istudiere u när aune vorfühere.
Das hei die Ringuviecher e super Plan gfunge u sie hei sofort nach angerne Ghiufme vo däm Vorhabe gsuecht. Das isch bi dere vorherrschende Längwili nid so e grossi Herusvorderig gsi. Am Ändi hei zuesätzlich zu de Rägewürm zwe Assle, e Wäber, drei Ohregrübbler, e Mischtchäfer, zwe Ameise, e feissi Roupe, e Tusigfüessler u no es Beieli mitgmacht. Jetz hetne nume no e Reschissör beziehigswys e Dirigänt gfäut. Für das hetne d’Chrützspinnele dr Höigümper vorgschlage, wo scho sit Tage ar Huswang a, imene mit Härd gfüute Graniumchischtli, gläge isch. Eigentlech hät sich z’Beieli anerbote die Ufgabe z’übernäh. D’Chefspinnele het aber gmeint, dass äs z’churzi Bei zum Dirigiere heig und wenn äs derzue am Flüge wär, würd’s mite Flügu z’vieu Lärme mache u dr Gsang störe. Schliesslich het dr Höigümper zuegseit u sie hei mit däm Ansambu munter afa Probe.
Am Afang isch das tip top glüffe u aui hei konzentriert mitgmacht u sich heftig igsetzt. Die fetti Roupe hat näbebi no d’Koschtüm für aui Künschtler entworfe u het die ou gschniederet. Mit ihrne Schniedezäng het sie us Bletter, finem Gstrüpp u aute Würzeli wunderschöni Chleidli baschtlet. Mit ihrem sidige Fade het sie die de zämegschnurpfet. Bi auem Flyss u Probe isch zwüschem Biendli u em Höigümper immer e chli dicki Luft gsi u die Aspannig isch grösser u grösser worde. Es het miter Zyt ou so wie zwöi Lager gä. Eis ufder Site vom Dirigänt u Reschissör u eis ums Biendli ume. Si hei grad e schwierige Teil güebt, wo sie sit langem nid richtig härebracht hei u da isch passiert, was het müesse passiere. Z’Beieli het sich ergeischteret, isch im wahrschte Sinn vom Wort i d’Luft gfloge u isch umegschwirrt wiene Gschtörti. Dr Höigümper isch umegumpet wie wener vore Chräie gjagt würd u het mit sine länge Arme umegfuchtlet winer ine Boxkampf verwicklet wär. Nidemau d’Spinnele het die eskalierti Situation me chönne beruhige u schliesslich het jede jede agmööget. Bi au däm Dürenang het niemer gmerkt, dass riesegi Schätte über sie cho si u plötzlech no aus vieu schlimmer worde isch. Es si nämmlech zwe Spatze cho z’flüge u z’mitz i däm Tumult glandet. Natürlich miter Absicht dr eint oder anger Chäfer oder Rägewurm z’främsle, wüu die aui sich ja wie ufem Siubertablet präsentiert hei.
Blitzschnäu het d’Chrützspinnele ihres grosse Netz vo de Bäuke glöst, so dass es uf die zwe Vögu abegheit isch. Das het die zwöi Flattertier afe mau abglänkt u verwirrt. Die Zyt hei die Meischte gnützt sich i Sicherheit z’bringe. Die Angere hei sich süsch probiert z’verstecke oder sich tot z’steue. Da het z’Beieli zum Sturzflug agsetzt u het zersch dr eint Vogu liecht gstoche u im nächschte Ougeblick no grad dr zöit Spatz. Nume liecht gstoche het z’Beieli, wüus süsch si Stachu verlore hät u dranne gstorbe wär. Dä Stich het aber glängt, dass es d’Spatze het afa bisse u brönne. Grad wo’s dr zwöit Flüguschleger gstoche het u wieder het wöue wägflüge, het dr anger Spatz mitem Schnabu nachem Beieli gschneut u häts ou verwütscht, wenn nid dr Höigümper übermüetig däm Vogu is Oug gumpet wär. Dä isch mega paff gsi u isch morzmässig erschrocke, so dass är im Chlupf mit auer Chraft wieder dervo gfloge isch. Das het dr zwöit Spatz ou verunsicheret und er isch am Erschte hingernache gflatteret u beid si was gisch was hesch ume Huusegge verschwunde u si nie meh gseh worde.
Z’Beieli u dr Höigümper si von denn a d’Superheude vo de angere Chrabbutier hingerem Outoungerstang gsi. Die zwöi hei sich vo denn a ou hervorragend verschtange u hei zäme am Chare gschrisse. Heisst, das Musical isch vo Tag zu Tag besser worde, aui hei e morz Spass gha u niemerem isches me längwilig gsi. U gli isch dr gross u sehnsüchtig erwartet Tag da gsi. Angänz jedes Insekt, um das Eifamiliehüsli, isch im Gärtli hingerem Outoungerstang versammlet gsi. Juscht i däm Momänt isch d’Sunne vürecho u het aune es bizzeli Wermi gspändet. D’Spinnele het es paar tiefgründegi Wort über Fründschafte u zämeha verzeut u isch amene Fade hängend nach obe verschwunde. Stiui het jetz gherrscht. Das Musical het du agfange, mit lieslige u töif dröhnende Tön vo de lengschte Rägewürm. Mite glitzerige und vieusitige Koschtüm si die angere Künschtler eine ume anger i Szene cho u der Gsang wie ou z’Schouspieu hei sich zuenähmend gsteigeret u gsteigeret. Am Höigümper isch dr Schweiss abeglüffe u är het mit aune Arme u sogar mitem Chopf das ganze Gscheh und die Musig orcheschtriert, wie är nie öbbis angers gmacht hät. Für aui Zueschouer u Interprete isch das es gwautigs Spektaku gsi, wo sie sich no lang dranne gfröit hei. Vo denn a isch ou ändlich schöns Wätter worde u dr Frühlig isch z’grächtem izoge u het das Gärtli zumene nöie Läbe erweckt.
Kommentar schreiben